قصة 

أم حنا وأم علي وزولابية عيد الغطاس (الظهور الإلهي).

بقلم:المربي جاسر  الياس داود

نادت أم علي على إبنتها حسنة، فحضرت مسرعة تاركة ترتيب الثياب والملابس، التي جمعتها عن المنشر، ولما وصلت إلى أمها، التي كانت جالسة بالصالون مع أبي علي، سألتها: نعم ماما إيش بدك مني، أنا حاضرة بتأمري وأنا بفعل.
إبتسمت أم علي وقالت: وبعدين يا بنتي الغالية حسنة، ما بدك تغيري هالكلام بتأمري وأنا بفعل؟!!!
ردت عليها حسنة قائلة: هاي تربايتك ماما، ناسيي لما كنا نجاوب نعم لأبوي ولغيرو لما كانو ينادو علينا انا وأختي رسمية، وكنت تقوليلنا مش هيك بجاوبو، انت علمتينا وإحنا بنسمع وبنعمل بحسب تربايتك، عشان ترضي علينا.
هزت الأم برأسها، ونظرت إلى حسنة، وقالت: ربنا يبعثلك بجاه هالعيد اللي بدو يهل علينا بكرا إبن الحلال يكون مثل أبوك، وتعيشي سعيدة ومعززة معاه آمين.
خجلت حسنة وطأطأت رأسها، ونظرت إلى أبيها، فابتسم لها، ومد يده نحوها قائلا: تعالي بنتي اباركك، فحنت جسدها، فطبع قبلة على جبينها، وقال: الله يسعدك يا حسنة على هالطاعة والإستقامة بحياتك آمين، قال هذا وهو فاتحا يديه إلى فوق. 
بعد أن أتم أبو علي كلامه، قالت أم علي لإبنتها حسنة: بدي دوري على كل نسوان جيرانا، وتقوليلهن: العصر بدي تيجو عنا ومعكو هاي الأغراض ........، عشان تعملو زولابية لأولادكو، لأنو أم حنا سافرت عند إبنها حنا اللي ساكن برية البلاد، وقوليلهن أمي بتساعدكو وبدلكو كيف تعملو هاي الزولابية عشان تفرحو أولادكو.   
عادت حسنة إلى البيت بعد أن أعلمت الجارات، وأبلغت أمها بأنها لم تجد الطبيبة حنان ببيتها.
قالت الأم: الله يكون بعونها هالدكتورة، بترجع من المستشفى، بتتغدى مع عيلتها، وبعدين بتروح على عيادتها وبتشتغل للساعة تماني. عشان هيك أنا بدي أعملها الزولابية، وباقي حلويات العيد عيد الغطاس بشتروها من دكانة أبو جريس. 
بعد عدة ساعات، قامت أم علي ومعها ابنتها حسنة، وأخذن بتحضير المواقد الثلاث، فوضعن كل ثلاثة حجارة نارية بمكان في ساحة البيت الرحبة والواسعة. ثم قمن وأحضرن الحطب، الذي جمعه أبو علي وأولاده من كرم الزيتون بعد إتمامهم جمع ثمار الزيتون، ووضعنه بين الحجارة الثلاث في المواقد الثلاث، ثم أحضرت حسنة من المخزن فنينة الكاز، ووضعتها بجانب أول موقدة، كي تكون حاضرة لسكبه على الحطب وإشعاله تحت المقلى الواسع المستدير. وبعد أن أتممن التحضيرات، نهضت أم علي، وتوجهت إلى المطبخ، وأخذت بتحضير مواد صنع الزولابية، وهي الطحين وحبوب القزحة ...  
في ساعات العصر أخذن النسوة بالدخول إلى ساحة بيت أبي علي، وهن يحملن بين أيديهن المواد، التي  سيصنعون منها الزولابية، وجلسن على الكراسي الصغيرة المصنوعة مقاعدها من أوراق نبات القصيب.
بعد حضور جميع الجارات، ما عدا الطبيبة حنان، قالت أم علي: إسمعو يا جاراتي، أنا ما حبيت يمر العيد بدون ما تفرحو ابناءكو وأهل بيوتكو بهالعيد، وكمان خلي أم حنا ما تلوم نفسها وهي عند ابنها حنا بالغربة، لأنها  سافرت بفترة الأعياد تتزورو وتزور عيلتو، صرلو سنين يترجاها إبنها حنا تتيجي لعندهن، وكانت إضل تقولو ما بغدر أترك أبوك لحالو، وبعد ما إتجوزو أولادها التنين اللي أصغر من حنا، وسكنوا بالطوابق اللي فوق بيتهن، وصار عندها كناين بتحبهن وبحبوها، ضغط عليها أبو حنا وأولادها ونسوانهن عشان تروح تزور ابنها حنا وعيلتو، وإنتو بتعرفو إنو أبو حنا ممنوع يسافر بالطيارة بسبب المشاكل الصحية اللي عندو، ومنهن مشاكل بالقلب. 
وأنا بقول وبشكر ربي اللي اعطاني جارة وأخت مثل أم حنا ومتلكو كمان، هيك الجيرة لا بلاش حبيباتي، والشكر لأم حنا اللي كانت كل عيد غطاس تناديني وتطلب مني أساعدها بصنع الزولابية، ومنها تعلمت صنعها، واليوم بدي أعلمكو صنعها، وانتو علمو بناتكو يصنعوها، لأنو بكرا بدهن يصيرو أميات، فلما أبنائهن بشوفوهن بعملو كعك وحلويات العيد بكل مناسبة عيد بكيفو.
ثم قامت أم علي بالشرح لهن عن كيفية صنع المادة للزولابية، فرحن الجارات، وقالت إحداهن: والله هيك فعالية بتدخل الفرح لقلوبنا قبل أولادنا، وانا يا خالتي أم علي بدي أقترح عليك وعلى خالتنا أم حنا لما ترجع بالسلامة من زيارتها لإبنها حنا، إنكو كل عيد تجمعونا إحنا جاراتكو قبل العيد بيومين أو ثلاثة، وتعلمونا كيف نصنع حلويات وكعك كل عيد، لأنو الكعك والحلويات اللي بالدكاكين مش راح تكون ألذ من اللي بتعملوه إنت وام حنا. 
فردت عليها أم علي، وقالت: أنا بمون على جارتي وأختي أم حنا، وبقولكو إحنا حاضرات نعلمكو كيف تصنعو كعك وحلويات كل عيد وعيد، وصحتين على قلوبكو وقلوب عائلاتكو، وكل عام وانتو بألف خير، وعقبال لكل سنة يا رب آمين.