ميلادك دفّى كانون

شعر زهير دعيم

موّال:

جبل النّور والتلّه وقمرنا

وباسم الحبّ والجيره أمرنا

لغير الربّ منسَلِّم أمِرنا

ولو سدّوا علينا ألف باب

 ميلادك دفّى كانون

وفرَّح العدرا الحنونْ

بنحبَّكَ إحنا بْجنونْ

يا يسوعنا يا غالي

بعيدك تْغنّى الملاكْ

ورقصتْ في السما الأفلاكْ

ما أسماك  وما أحلاكْ

يا الهنا السّماوي

موج الليل وعتماتو

شعّوا وقت طلاًتو

ما احلى الرّاعي وسجداتو

لطفل السما الفادي

المجوسي أجا من بعيد

يسجد للطفل السعيدْ

حامل بكيسو هدايا

وفرح  ورجا ومْواعيد

خيّمْ علينا بحبّك

وازعنا زهرة  بقلبك

مُنانا نمشي بدربك

 يا يسوعنا  يا غالي